27.3 C
Colombo
බදාදා, මැයි 22, 2024

IMF ගියොත් රජයේ සේවකයින් අඩුකරන්න කියයි – මහ බැංකු අධිපති

Must read

මේ අවස්ථාවේදී ජාත්‍යන්තර මූල්‍ය අරමුදල වෙත ගියහොත් රජයේ සේවකයින් ප්‍රමාණය අඩුකිරීම, විශ්‍රාම වැටුප් අඩුකිරීම හෝ කප්පාදු කිරීම වැනි කොන්දේසිවලට මුහුණ දීමට සිදුවිය හැකි බවත් ඔවුන්ගේ ප්‍රතිසංස්කණ න්‍යාය පත්‍රයන් හි සාමාන්‍යයෙන් එවැනි කොන්දේසි ඇතුළත් වන බවත් මහ බැංකු අධිපති අජිත් නිවාඩ් කබ්රාල් මහතා පවසයි.

මහ බැංකු පරිශ්‍රයේ පැවති මාධ්‍ය හමුවක දී අධිපතිවරයා මේ බව කියා සිටියේය. පවතින තත්ත්වය තුළ බොහෝ දෙනෙකු ශ්‍රී ලංකාව මේ මොහොතේ දී ජාත්‍යන්තර මූල්‍ය අරමුදල වෙත යා යුතු බව කියා සිටිය ද එසේ නොයන්නට හේතු සඳහන් කරමින් මහ බැංකු අධිපතිවරයා මෙහිදී දීර්ඝ කරුණු දැක්වීමක් ඉදිරිපත් කළේය.

අපේ අය සමහර වෙලාවට අහනවා ජාත්‍යන්තර මූල්‍ය අරමුදලට යන්නේ නැත්තේ ඇයි කියලා.

ජාත්‍යන්තර මූල්‍ය අරමුදලට යන එකට අපට කිසිම ගැටළුවක් නැහැ, අපට අවශ්‍ය නම්. 2009 දි 10 දි අපි ගිහිල්ලා තියෙනවා.

ඒ නිසා කිසිකෙනෙක් හිතන්න නරකයි ඒකට අපිට යන්නට බයක් තියෙනවා හෝ ප්‍රශ්නයක් තියෙනවා කියලා. එහෙම නෙමෙයි මෙතන තියෙන්නේ, ණය ප්‍රශ්නයට අපි මුහුණ දෙන්න අවශ්‍යයි.

මේ ණය ප්‍රශ්නයට මූලික හේතුව තමයි 2018 අප්‍රේල් මාසයේ සිට 2019 ජූනි මාසය දක්වා ඇමරිකානු ඩොලර් බිලියන 6.9 ක් මේ රටට ණය හැටියට අරන් තියෙනවා ස්වෛරීය බැඳුම්කරවලින්.

ඒ කාලය වෙනකොට අපේ රටේ තිබුණු ණය ප්‍රමාණයට ISBsවලට සෑහෙන දැඩි පීඩනයක් ආවා. 2014 දී මේ රටේ ජාත්‍යන්තර ස්වෛරීය බැඳුම්කර තිබුණේ ඇමරිකානු ඩොලර් බිලියන 5 යි.

රටේ දළ දේශීය නිෂ්පාදිතය තිබුණේ බිලියන 79 යි. 2019 අග වෙන කොට අපේ රටේ ජාත්‍යන්තර ස්වෛරීය බැඳුම්කර තිබුණා බිලියන 15 ක්. රටේ දළ දේශීය නිෂ්පාදිතය වැඩිවෙලා තිබුණේ බිලියන 84 දක්වා පමණයි. සියයට 6 ක ස්වෛරීය බැඳුම්කර තිබුණු ප්‍රතිශතය සියයට 18 දක්වා වැඩිවෙලා තිබුණා.

එතනදී අපි තීරණයක් ගත්තා තවදුරටත් ජාත්‍යන්තර ස්වෛරීය බැඳුම්කරවලින් ණය අරගෙන අපි ණය උගුලක වැටෙන්න පුළුවන් නිසා එතනින් එහාට ගිහිල්ලා වෙනත් ක්‍රමවලට ණය ගැනීමත්, සමහර ණය අඩුකර ගනිද්දී විවිධ වෙන ක්‍රම පාවිච්චි කිරීමටත්. ඒකට තමයි දැන් කටයුතු කරගෙන යන්නේ.

එහෙම කරගෙන යාම තමයි ජාත්‍යන්තර මූල්‍ය අරමුදල වුණත් ඇවිල්ලා අපිට දෙන උපදෙස. වෙන උපදෙසක් නෙමෙයි දෙන්නේ. ණය ප්‍රතිව්‍යූහගතකරණය කියලා කියන්නේ වෙනත් ක්‍රමවලට ණය ගෙවීමට පෙළඹීම. ඉතිං ඒ නිසා ඒ කටයුත්ත අපි ඉතාමත්ම කල්පනාකාරීව විද්‍යාත්මකව කරගෙන යනවා. ඒක කරගෙන යන නිසා පිටස්තර කෙනෙක්ගේ අවශ්‍යතාවයක් උපකාරයක් අවශ්‍ය නැති බවයි අපේ තීරණය. ඒත් එක්කම තවත් තීරණ අරන් තියෙනවා. අපි උපරිම සිල්ලර මිල ගණන් වෙනස්කරලා තියෙනවා. සමහරක් තැන්වල දී අයින් කරලා තියෙනවා.

ඒ වගේ දේවල් IMF කියන්න පුළුවන් දේවල්. ඊට අමතරව IMF කියන්න පුළුවන් තවත් දේවල් තමයි රුපියල් අවප්‍රමාණය කරන්න කියන්න පුළුවන්. පොළී අනුපාතය තවදුරටත් සියයට 30 කින් 40 කින් 50 කින් වැඩිකරන්න කියන්න පුළුවන්. රජයේ සේවකයින්ගේ ප්‍රමාණය අඩුකරන්න කියන්න පුළුවන්. විශ්‍රාම වැටුප් අඩු කරන්න හෝ කප්පාදුවක් කරන්න කියන්න පුළුවන්. විවිධ රාජ්‍ය දේපලවල් විකුණන්න කියන්න පුළුවන්. ඒ වගේ කොන්දේසි සාමාන්‍යයෙන් reform agenda එකකට ඒගොල්ලෝ ගේනවා. ඒ reform agenda එකක් අපිට දැන් අත්‍යාවශ්‍ය නැහැ කියන එක තමයි අපේ මතය. ඒක නොකර අපිට ණය දීලා තියෙන අයට කරදරයක් කරන්නේ නැතුව මේ කටයුත්ත කරන්න පුළුවන් කියන එක තමයි අපගේ මතය.

More articles

Latest article