27.9 C
Colombo
සඳුදා, මැයි 27, 2024

ලබන වසරේ‍ ගෙවීමට ඇති විදෙස් ණය සෑම ඩොලරයක්ම ගෙවනවා – අමාත්‍ය බැසිල් රාජපක්ෂ

Must read

ණය වශයෙන් ලබන වසරේ ගෙවන්නට ඇති සෑම ඩොලරයක්ම ගෙවන බව මුදල් ඇමැති බැසිල් රාජපක්ෂ මහතා පාර්ලිමේන්තුවේදී ප්‍රකාශ කළේය.

ආර්ථික ප්‍රතිපත්ති හා සැලසුම් ක්‍රියාත්මක කිරීමේ අමාත්‍යාංශය, මුදල් අමාත්‍යාංශය, මුදල් හා ප්‍රාග්ධන වෙළෙඳපොළ සහ රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍යාංශය, සමෘද්ධි, ගෘහ ආර්ථික, ක්ෂුද්‍ර මූල්‍ය, ස්වයං රැකියා හා ව්‍යාපාර සංවර්ධන රාජ්‍ය අමාත්‍යාංශය කාරක සභා වැය ශීර්ෂයට අදාළ විවාදයට එක් වෙමින් ඇමැතිවරයා මේ බව කියා සිටියේය.

ජනවාරි මාසයේදී අමෙරිකානු ඩොලර් මිලියන 500ක් සහ ජූලි මාසයේදී ඩොලර් මිලියන 1,000ක් ගෙවීමට ඇති අතර, ඊට අමතරව ණය සේවා, ගෙවීම් ප්‍රාග්ධන, ණය සේවා කළමනාකරණ ආදි වෙනත් ගෙවීම්ද ඇති බවත් රාජපක්ෂ මහතා පැවසීය.

වත්මන් ආණ්ඩුව බලයට පත් වන විට ‘ගම්පෙරළිය‘ පාසල් ව්‍යාපෘතිය ආදියට ඩොලර් බිලියන 454ක් ගෙවීමට තිබූ බවත් ඒ සියලු ගෙවීම් කළේ නම් ආර්ථිකය ඍණ අගයක් ගනු ඇති බවත් රාජපක්ෂ මහතා පෙන්වා දුන්නේය.

අද රටේ මෙවැනි ආර්ථික අර්බුදයක් නිර්මාණය වී ඇත්තේ යහපාලන ආණ්ඩුව වසර 5ක් තුළ අනුගමනය කළ වැරැදි ක්‍රම නිසා බවද හෙතෙම කීවේය.

සියලු ණය ගෙවා අවසන් කර නැවත ණය නොගෙන සිටීම ආණ්ඩුවේ අරමුණ බවත් රාජපක්ෂ මහතා පැවසීය.

ඒ මහතා වැඩිදුරටත් මෙසේද පැවසීය.

“අය වැය විවාදය අවසානයේදී මුදල් අමාත්‍යාංශයට අදාළව තුන්වැනි වර කියවීමත් කෙරෙනවා. අපි බලයට පත් වුණ විට ගෙවීමට විශාල බිල් ප්‍රමාණයක් තිබුණා. බිලියන 454ක බිල් තිබුණා. අපි ඒ සියල්ල ගෙව්වනම් මේ මට්ටමින් වත් යන්න වෙන්නේ නැහැ. ඍණ අගයක් ගන්නවා. අපි යථාර්ථය තේරුම්ගත යුතුයි. අපි එනකොට විවිධ බිල් තිබුණා. ගම්පෙරළිය පාසල් ව්‍යාපෘති ආදි විවිධ බිල් තිබුණා. තව ගොඩක් බිල් තිබුණා. බිලියන 454ක බිල්. අපි පත්ව තිබෙන, රට පත්ව තිබෙන තත්ත්වය ගැන මම අය වැය දවසෙත් කිව්වා. විදේශ සංචිත, ණය අර්බුදය මේ හැම දෙයක්ම මම කිව්වා. විපක්ෂයේ කිහිප දෙනෙක්ම මේ ගැන පැහැදිලි කළා. මුදල් අර්බුදයක් අපට තිබෙනවා. විදේශ සංචිත පිළිබඳත් අර්බුදයක් තිබෙනවා. මුදල් ඇමැතිවරයා ලෙස මම මේ සභාවේදී ප්‍රකාශ කරනවා, ජනාධිපතිවරයාගේ හා අගමැතිවරයාගේ අවසරය මත අපට ගෙවන්න තිබෙන සෑම ඩොලර් එකක්ම ලබන වසරේදි ගෙවනවා. අනිවාර්යයෙන්ම එම ගෙවීම් කරන බවට මම සහතික වෙනවා. ඒ සහතිකය දෙන්නේ වගකීමකින්. එහිදී පළමු වාරිකය ජනවාරි මාසයේදී ඩොලර් මිලියන පන්සියයක් ගෙවන්න තිබෙනවා. ජූලි මාසයේදී ඩොලර් මිලියන 1,000ක් ගෙවන්න තිබෙනවා. ඒ අතරමැද අපට ගෙවන්න තිබෙනවා, ණය සේවා, ගෙවීම් ප්‍රාග්ධන ආදි වශයෙන් ප්‍රමාණයක් . ඒ වගේම ණය සේවා කළමනාකරණය වෙනුවෙන්ද යම් ගෙවීම් ප්‍රමාණයක්. ඒ සියල්ලම ගෙවන බව සඳහන් කරනවා. ඒ වගේම විදේශ මුදල් ගලා ගිය ආකාරය හා අපට ආපු ආකාරය ගැනත් වසර කිහිපයක් ඇසුරින් පැහැදිලි කළ යුතුයි. අපි 2019දී අමෙරිකා ඩොලර් මිලියන 31,674කට අධික මුදලක් ගලාගෙන ආවා. විවිධ ක්‍රමවේදවලින්. භාණ්ඩ අපනයනයෙන්. සේවාවලින් විවිධ ක්‍රමවලින්. විදේශ ප්‍රේෂණවලින්. ආයෝජන හා විවිධ ණය ගැනීම් ආදියෙන්. ගොඩක් අය කියනවා කොවිඩ් නිසා මොකුත් වුණේ නැහැ කියලා. 2019දී අපට අමෙරිකා ඩොලර් තුන්දහස් ගණනකට වැඩි මුදලක් ලැබුණා. නමුත් මේ වසරේදී සංචාරක කර්මාන්තයෙන් ලැබුණේ ඩොලර් මිලියන 100යි. කල්පනා කරන්න. මොන තරම් අර්බුදයකට කොවිඩ් නිසා අපි පත් වුණාද කියලා. විදෙස් සම්ප්‍රේෂණ යම් ප්‍රමාණයක් ලැබුණා. නමුත් එයත් 6,103කින් අඩු වුණා.

2020 දී යම් ප්‍රමාණයක් ලැබුණා. කොවිඩ් නිසා විතරක් නෙවෙයි. මේ ආර්ථිකය කඩා වැටුණේ. තව එක කාරණයක් තිබෙනවා. පසුගිය අවුරුදු පහක කාලයේදී ඔබතුමාලා කරපු වැඩ නිසාත් මේ දේවල් වැටුනා. කොවිඩ්වලට අමතරව මෙරට ආර්ථිකය කඩා වැටීමට පසුගිය ආණ්ඩුවේ වසර පහක කාලය තුළ කළ ක්‍රියාවන්ද බලපෑවා. ඒකත් අවංකව පිළිගන්න. ඒකෙ ප්‍රධාන වගඋත්තරකරුවන් වන්නේ ඔබතුමාලා. ඒ නිසා තමයි එක්සත් ජාතික පක්ෂයෙන් ඡන්දයවත් ඉල්ලන්න බැරි වුණේ. වෙන නැවක් හදාගෙන ඡන්දය ඉල්ලුවේ ඒ නිසා. ඒක නිසා අපට මේ වසරේදී විදේශ මුදල් හිඟය 2014දී අමෙරිකානු ඩොලර් බිලියන 981ක හිඟයක් තිබුණා. 2021දී මේ හිඟය බිලියන 4,703කට වැඩි වී තිබෙනවා. අපේ සැලැස්ම මෙය ක්‍රමානුකූලව අඩු කර ගැනීමයි. ඒ වෙනුවෙන් අපේ අපනයන වැඩි කර ගත යුතුයි. 2017දී අපේ අපනයන ආදායම අමෙරිකානු ඩොලර් මිලියන 941යි. 2018දී 980යි. 2019දී 979යි. 2020දී 751කට බැස්සා. නමුත් අපි කියන්න ඕන අපේ පෞද්ගලික අංශයත්, ගොවියා, ධීවරයා ආදි අය දෙන දායකත්වය. කර්මාන්ත ශාලා, වතු කම්කරුවන් දෙන දායකත්වය නිසා 2021 නොවැම්බර්වල ඩොලර් මිලියන එක්දහස් දෙසිය තිස් දෙකකට වැඩි කර ගැනීමට හැකි වුණා. අපට සැලැස්මක් නැහැ කිව්වා. විදේශ සම්ප්‍රේෂණවලින් අපි විශාල මුදලක් ගන්නවා. එවැනි මුදලක් ගන්න නම් අපේ ශ්‍රමිකයෝ රට යන්න ඕන. ශ්‍රමිකයන් 230,000ක් යවන්න පුළුවන් වුණා. කොවිඩ් නිසා පසුගිය වසරේ 53,000යි යවන්න පුළුවන් වුණේ. 230,000ක් ගිහිං තමන්ගේ විදේශ මුදල් උපයා එව්වත් නේවුවත් 53,000ක් ගිය විට එය හතරගුණයකින් පමණ අඩු වෙනවා. විශේෂ අමාත්‍යාංශයක් පිහිටුවා 100,000කට වඩා යවා තිබෙනවා. ලබන වසරේ 300,000ක් දක්වා වැඩි කරනවා. ලබන වසරේ කොරියා, ජපානය, එංගලන්තය, රුමේනියා අලුත් සේවාවලටත් යනවා. විදේශ විනිමය මිලියන 7,104යි. එය ඩොලර් මිලියන 8,000ක් ලබන වසරේදී පන්නනවා. විදේශ සංචිත හම්බ කරනවා වගේම ගෙන්වනවා. මෙරට ගොවි ජනතාවට වගා කළ හැකි බෝග වගා කිරීමට ආරම්භ කර තිබෙනවා. ඉතා කල්පනාවෙන් පරෙස්සමින් මේ කටයුතු කරන්න ඕන. අපි හිතන තරම් වේගයෙන් විදේශ ආයෝජන එන්නේ නැහැ. ව්‍යාපාරිකයා හැමවිටම තමන් ලාබ උපයා ගන්නා ආකාරය ගැන තමයි බලන්නේ. විදේශ ආයෝජකයන් අපේ රටට වඩා වේගයෙන් හම්බ කළ හැකි රටවලට යන්න පුළුවන්. හිතන තරම්වත් කියන තරම්වත් විදේශ ආයෝජන අපේ රටට එයි කියලා හිතන්නේ නැහැ. විදේශ ආයෝජකයකු ආවාම සල්ලි ගෙනියන්නෙත් විදේශ මුදලෙන්. කෙටි කාලීනව නොබල දිගු කාලීනව මුදල් රටේ රැකෙන විදියක් බලනවා. සංචාරක ව්‍යාපාරය හරහා මුදල් වේගයෙන් ගලා ඒමට අපි අපේක්ෂා කරනවා. මෙරට ලොක්ඩවුන් කරන විට සෞඛ්‍ය පැත්තෙන් අපේ ජීවිත බේරා ගැනීමට කටයුතු කළා. ජීවිත බේරා ගන්නා විට අපේ ජීවනෝපායන් නැති වුණා. කොවිඩ්වලට නීති දැම්මා. ඩුබායිවල, මාලදිවයින රටවල අපේ රට වගේ නොවන්නේ ඇයි කියලා විපක්ෂය ඇහුවා. ඒ රටවල් අපේ රටට කලින් විවෘත කළා. අපිත් විවෘත කරන්න සූදානම් වන විට විපක්ෂය කීවා ගණිකාවන් ගේන්න විවෘත කරනවා කියලා. ඒ නිසා අපි නැවත වැසුවා. සේවා අංශය ලෙස විශේෂ අංශයක් තිබෙනවා. සේවා අංශයේ නාවික පැත්ත, අයි.ටී. පැත්ත සංවර්ධනය කරනවා. ගුවන් සේවාවලින් සේවා සපයා ආදායමක් ගත හැකියි. අයි.ටී. පැත්තෙනුත් අපට ආදායම් ගත හැකියි. ඉහළම තාක්ෂණික ආයතන මේ රටට ඇවිත් තිබෙනවා. 2022 වන විට 5,000ක් තරුණයන් එයට ගන්නවා. මේ වසර අවසන් වීමට පෙර ෆෝචූන් මට්ටමේ ආයතන තුනක්වත් රටට එනවා. නිවෙස්වල සිට තරුණයන් මෙමඟින් හම්බ කරනවා. ගමේ සිටින විශාල පිරිසකට ෆ්‍රීලාන්ස් තමුන්ටම මේ තාක්ෂණය මත මුදල් උපයා ගත හැකි ක්‍රමවේද හදනවා. අපට හංගන්න දෙයක් නැහැ. විදේශ විනිමය අර්බුදයක් තිබෙනවා. ඉතාම අමාරු තත්ත්වයක්. අයි.එම්.එෆ්. යන එක අලුත් දෙයක් නොවේ. 1961ක් ගියා. මමත් ගියා. මහින්ද මහතාගේ කාලයේ කබ්රාල් මහතා එක්ක මාත් ගියා. අපි ගත්තා. අයි.එම්.එෆ්. කොන්දේසි අවසන් කළ එකම ආණ්ඩුව අපි. විපක්ෂය නොදන්නවා වුණාට අදත් එහි නියෝජිතයන් මෙහේ ඇවිත් සිටිනවා. අයි.එම්.එෆ්. අපි යන්න ඕන නැහැ. ඒ අය මෙහේ ඇවිත් සිටිනවා. විපක්ෂය සමඟ සාකච්ඡා කිරීමට ඔවුන් වෙලාවක් ඉල්ලුවත් වෙලාවක් නොලැබුණු බව ඔවුන් කීවා.”

More articles

Latest article