28.8 C
Colombo
ඉරිදා, මැයි 26, 2024

අතිපූජ්‍ය වැලමිටියාවේ කුසලධම්ම නාහිමියන් රට වෙනුවෙන් ඉටු කළ ‍සේවාව වචනයෙන් විස්තර කරන්න බෑ – අග්‍රාමාත්‍ය මහින්ද රාජපක්ෂ

Must read

විටින් විට රටේ ඇතිවන විවිධ ගැටලුවලදී සුවිශාල නායකත්වයක් ගෙන කටයුතු කළ ගෞරවණීය වැලමිටියාවේ ධර්මකීර්ති ශ්‍රී කුසලධම්මාභිධාන නායක ස්වාමීන්වහන්සේ, රට වෙනුවෙන් ඉටුකළ ‍සේවාව වචනයෙන් විස්තර කළ නොහැකි බව අගමැති මහින්ද රාජපක්ෂ මහතා පැවසීය.

පෑලියගොඩ විද්‍යාලංකාර මහ පිරිවෙන් අධිපති හා අධ්‍යක්ෂ, කැලණිය විශ්වවිද්‍යාලයේ කුලපති ත්‍රිපිටක වාගීශ්වරාචාර්ය, සාහිත්‍ය විශාරද, දර්ශන විශාරද, අග්ගමහා සද්ධම්මජෝතිකාධජ, මහෝපාධ්‍යාය කොළඹ හලාවත දෙදිසාවේ ප්‍රධාන සංඝනායක ආචාර්ය ගෞරවාර්හ වැලමිටියාවේ ධර්මකීර්ති ශ්‍රී කුසලධම්මාභිධාන නායක ස්වාමීන් වහන්සේ අපවත් වූ පුවත ඇසීමෙන් මම බලවත් සේ සංවේගයට පත්වූ බව ශෝක පණිවිඩයක් නිකුත් කරමින් අගමැතිවරයා කියා සිටියේය.

තම දිවිය වසර 85ක් වැනි කලකදී අවසන් කරන අපේ නායක හාමුදුරුවන්, ඉන් වසර 67 ක්ම වෙන් කෙළේ සම්බුදු සසුනේ සිල්වත් ගුණවත් මහා ථෙරනමක් ලෙස පරාර්ථ චර්යාවේ යෙදීම සඳහාමය.

සාහිත්‍ය චක්‍රවර් ති ගෞරවාර්හ යක්කඩුවේ ශ්‍රී ප්‍රඥාරාම , ගෞරවාර්හ කිරිවත්තුඩුවේ ශ්‍රී ප්‍රඥාසාර වැනි සම්බුදු සසුන එළිය කළ නායක ස්වාමීන් වහන්සේලාගේ ඇසුර හා මාර්ගෝපදේශකත්වය නිරන්තරයෙන් ලැබීමට අපේ නායක හාමුදුරුවෝ වාසනාවන්ත වූහ.

විද්‍යාලංකාර විශ්වවිද්‍යාලයෙන් සිංහල භාෂාව පිළිබඳ ගෞරව උපාධිය හිමිකරගත් නායක ස්වාමීන් වහන්සේ, පන්නිපිටිය විද්‍යාලංකාර පිරිවෙන කේන්ද්‍රීයව ධර්ම ශාස්ත්‍ර සේවාවන් ආරම්භ කළහ.

විශේෂයෙන් මාගේ දේශපාලන ගමන්මගේ දී පමණක් නොව පෞද්ගලික ජීවිතයේදී ද නායක ස්වාමීන් වහන්සේ කටයුතු කෙළේ දැඩි මිත්‍රත්වයකිනි.

මා වෙත පැමිණි විවිධ බාධක හා ගැටලු අවස්ථාවන්හී දි අත් නොහැර කටයුතු කළ නායක ස්වාමින් වහන්සේ, මාහට මහත් ශක්තියක් වු අතර, එහිදී දුන් අවවාද අනුශාසනා හා ආදර්ශ බොහෝය. උන්වහන්සේ වචනයේ පරිසමාප්ත අර්ථයෙන්ම දැඩි කල්‍යාණ මිත්‍ර ථෙරනමකි.

හමුවූ විට නිතර මා සමඟ සාකච්ඡා කෙළේ රට දැය මෙන්ම සම්බුදු සසුනේ චිරස්ථිතිය වෙනුවෙන් කටයුතු ඉටුකිරීමට ය.

විද්‍යාලංකාර සම්ප්‍රදාය ආරක්ෂා කරමින් ශිෂ්‍ය භික්ෂූන් වහන්සේට මහත්සේ ඇලුම් කළ නායක ස්වාමීන් වහන්සේ උගත් සිල්වත් භික්ෂු පරපුරක් සසුනට දායද කිරිමට වෙහෙස වී ක්‍රියා කළහ.

සමස්ත ලංකා ශාසනාරක්ෂක බලමණ්ඩලයේ ගරු සභාපතිත්වය දරමින් දහම් පාසල් දූ දරුවන් දැයට හිතැති ගුණවත්, නැණවත් දරු පිරිසක් බවට පත්කිරීම උන්වහන්සේගේ පරම අභිලාෂය වූහ.

මල්වතු මහා විහාරය මඟින් කොළඹ හලාවත දෙදිසාවේ ප්‍රධාන සංඝනායක ධූරය හා උපාධ්‍යාය ධූරය උන්වහන්සේට පිරිනැමුවේ නායක ස්වාමීන් වහන්සේ ඉටුකරන උදාර ජාතික හා ශාසනික සේවාව නිසාමය.

විදේශ රටවල් ගණනාවක ධර්ම ප්‍රචාරය සඳහා කටයුතු කළ නායක ස්වාමීන් වහන්සේ, විදේශීය භික්ෂූන් වහන්සේලාට මෙන්ම එම ජනතාවට ඉටුකරන මෙහෙය නිසාම බුරුම රජය මඟින් අග්ගමහා සද්ධම්ම ජෝතිකධජ යන ගෞරව නාම සම්මුතිය උන්වහන්සේට පිරිනැමූහ.

‘වයධම්මා සංඛාරා අප්පමාදේන සම්පාදේථ’

සියලු සංස්කාර ධර්මයෝ නැසෙන සුළුය

අප්‍රමාදව ගුණදම් වඩන්න

මෙම ලොව්තුරු බුදුවදන මැනවින් වටහාගත් නායක ස්වාමීන් වහන්සේ සැමවිටම ගුණදම් වැඩු අතර, සෑම මසකම ශ්‍රී මහාබෝධීන් වහන්සේ වන්දනා කිරීමට අමතක කෙළේ නැත.ත්‍රෛනිකායික භික්ෂු මහා සංඝයා වහන්සේ සමඟ නිරන්තර ලෙන්ගතු කමින් කටයුතු කළ අතර, සැමවිටම සිනා මුසුව සිටි ආදර්ශ සම්පන්න ගුණගරුක මහ ථෙරනමකි. නායක ස්වාමීන් වහන්සේගෙන් ගත හැකි ආදර්ශ බොහෝය. උන්වහන්සේගේ අපවත්වීමෙන් ඇති වූ හිඩැස පිරිමැසිය නොහැකිය.

පුරා වසර 85ක් ආයු වළදා අපවත් වී වදාළ ගෞරවාර්හ වැලමිටියාවේ කුසලධම්ම නායක ස්වාමීන් වහන්සේට උතුම් නිවන්සුව අත්වේවා’ යි ප්‍රාර්ථනා කරමි. එසේම උන්වහන්සේගේ සහෝදර හා ශිෂ්‍ය භික්ෂූන් වහන්සේලාටත්, විද්‍යාලංකාර පිරිවෙන් දායක සභාවටත්, සියලු ඥාතීන් ඇතුළු සැමටත් මාගේ බලවත් සංවේගය පිරිනමමි.

More articles

Latest article