අද (15) දින ගනුදෙනු අවසානයේ දී කොළඹ කොටස් වෙළඳපොළ සියලු කොටස් මිල දර්ශකය ඒකක 164.04 (1.82%) කින් ඉහළ ගොස් ඒකක 9,191.52 ලෙසින් වාර්තා විය. මෙලෙස සියලු කොටස් මිල දර්ශකයෙහි වර්ධනයක් පෙන්නුම් කළේ වාර්තාගත 12වන දිනයට වීම විශේෂත්වයකි.
මේ අතර අද දිනයේ දී රු. බිලියන 5.82 ක ගනුදෙනු පිරිවැටුමක් වාර්තා වූ අතර එහිදී වැඩිම දායකත්වයක් ලංකා IOC සමාගමෙන් ලැබී තිබුණි. එය දැක්වුනේ රු. බිලියන 1.08 ක් ලෙසයි. මීට අමතරව බ්‍රවුන්ස් ඉන්වෙස්ට්මන්ට්ස් රු. මිලියන 538.72 ක්, එක්ස්පෝලංකා හෝල්ඩිංග්ස් රු. මිලියන 499.22 ක් හා හේලීස් රු. මිලියන 474.68 ක් ලෙසින් දෛනික පිරිවැටුමට වැඩි දායකත්වයක් ලබා දුන් සෙසු සමාගම් අතර පෙරමුණේ විය.
සියලු කොටස් මිල දර්ශයේ ඉහළ යාම සඳහා සමාගම් 141 ක් ධනාත්මක දායකත්වයක් ලබා දී තිබූ අතර සෙලින්කෝ ඉන්ෂුවරන්ස්, බ්‍රවුන්ස් ඉන්වෙස්ට්මන්ට්ස්, ජෝන් කීල්ස් හොල්ඩිංස්, සම්පත් බැංකුව, සොෆ්ට්ලොජික් හෝල්ඩිංස් යන සමාගම් මෙලෙස සියලු කොටස් මිල දර්ශකයේ වර්ධනයට ඉහළ දායකත්වයක් ලබා දුන් සමාගම් අතර කැපී පෙනුනි.
