දේශපාලන, ආර්ථික සහ සමාජ අභියෝග හමුවේ රට ගොඩනඟන වැඩපිළිවෙළක් සකස් කිරීමේ අරමුණින් තවත් දේශපාලන පක්ෂ ඇතුළු සංවිධාන පහළොවක් සමඟ පසුගිය 15දා එක්සත් ජාතික පක්ෂය සිරිකොත පක්ෂ මූලස්ථානයේදී සාකච්ඡා පැවැත්වූ බව එම පක්ෂයේ මහ ලේකම් පාලිත රංගේ බණ්ඩාර මහතා පැවසීය.
එක්සත් ජාතික පක්ෂයේ මූලිකත්වයෙන් රටේ සියලු බලවේග එකට ඒකරාශී කිරීමේ වැඩපිළිවෙළේ එක් පියවරක් ලෙස පැවැත්වුණු මෙම සාකච්ඡාවට පක්ෂ සභාපති වජිර අබේවර්ධන, නියෝජ්ය නායක රුවන් විජයවර්ධන මහත්වරුන්ද සහභාගි වූ අතර දේශපාලන පක්ෂ, සිවිල් සංවිධාන, වෘත්තිය සමිති, ආගමික සහ විවිධ සම්භවයක් සහිත සංවිධානවල සාමාජිකයන් එක් වූ බවත් මහ ලේකම්වරයා කීය.