දෙහිවල සත්වෝද්‍යානයේ සිටින අකිරා, ඩුමා සහ ලියෝ නම් ලද බෙංගාල ව්‍යාඝ්‍ර පැටවුන් තිදෙනාගේ මව වන “කෙල්ල” නැමති ව්‍යාඝ්‍ර ධේනුව මියගොස් ඇත. එම පැටවුන්ට ඉකුත් මාර්තු 05 වන දින උපත දුන් ව්‍යාඝ්‍ර මව බෙල්ලේ ඇතිවූ දරුණු පිළිකා රෝගයකින් පීඩා විදිමින් සිටි බව දෙහිවල සත්වෝද්‍යානයේ අධ්‍යක්ෂ ජනරාල් තිලක් ප්‍රේමකාන්ත මහතා පැවසීය.
ව්‍යාඝ්‍ර ධේනුව සත්වෝද්‍යානයේ පශු වෛද්‍යවරුන් සහ සත්ව අංශයේ කාර්ය මණ්ඩලයෙන් ප්‍රතිකාර ලබමින් සිටි අතර වූ ඇය මිය යනවිට වයස අවුරුදු 15 කි. චීනයේ ෂියැංජින් සෆාරි උද්‍යානයෙන් සත්ත්ව හුවමාරු වැඩසටහනක් ඔස්සේ 2008 වසරේදී ශ්‍රී ලංකාවේ දෙහිවල සත්වෝද්‍යානයට මෙම ව්‍යාඝ්‍ර ධේනුව රැගෙන විත් තිබිණි. ඇගේ සිරුර පිළිබඳ පශ්චාත් මරණ පරීක්ෂණ කටයුතු සහ අනෙකුත් පරීක්ෂණ කටයුතු පශු වෛද්‍යවරුන් විසින් සිදු කිරීමට නියමිත අතර වනජීවි දෙපාර්තමේන්තුවේ නිලධාරීන් ද එයට සහභාගි වීමට නියමිත බව අධ්‍යක්ෂ ජනරාල්වරයා කීය.
